香茜肉碎餃

噚日係街市買咗D無梘水味ge黃色餃子皮返嚟，跟住用埋噚日整腸粉剩低的材料，係大少同二少出咗去返學的時候，包定等佢哋返嚟食...

果然真係無梘水味...正!!!

材料(約70隻)：
雲吞皮(黃色去梘餃子皮)…...............12兩 (1斤大約有100張)
半肥廋豬肉碎………………...........………11兩
木耳.................................................1瓣
香茜.................................................3/5兩
水.....................................................適量

調味料：
鹽、麻油、胡椒粉、粟粉適量

做法：
(1) 木耳先用熱水浸腍，切絲備用。
(2) 把調味料、材料加入豬肉碎中攪勻成餡料。
(3) 取一塊餃子皮，把餡料放餃皮中，於餃子皮的邊塗上水，對摺成三角形(同時盡量把餃子中的空氣壓出)，再將兩邊角向中間摺。
(4) 煲滾水，放下餃子，煲至餃子浮面即成。

註：
勿塗過多的水將餃子定位，只需用來封口便可，因太多會另餃子皮過硬。湯底可隨個人喜好自行選擇，我較喜歡用清水，因我喜歡點辣的醬油一起吃，而小朋友又可以食得清一點。

香茜肉碎腸

今日手痕，整咗碟香茜肉碎腸比大少做宵夜，好味...但係個賣相就... =.="

個皮真係好難包，原本想懶吓，唔用布包，睇嚟下次真係要試吓用布包先至得...

腸粉漿材料 (約4~5條)：
水磨粘米粉......................................40克
鷹粟粉.............................................7克
馬蹄粉.............................................7克
水....................................................250克

做法：
(1) 蒸籠加水大火燒開，鐵盤加油數滴掃均，放入蒸籠內加蓋蒸熱約30秒。
(2) 開蓋，加攪散均勻的粉漿於盤中，使粉漿水在盤上均勻散佈成薄薄的一層。
(3) 排上內餡，大火蒸約3分鐘。
(4) 取出鐵盤，用蛋糕刮刀捲起即可。

內餡材料：
半肥廋豬肉碎…………………………1兩

木耳.................................................小許
香茜.................................................小許
水.....................................................適量

調味料：
鹽、麻油、胡椒粉、粟粉適量

做法： 

(1) 木耳先用熱水浸腍，切絲備用。 

(2) 把調味料、材料加入豬肉碎中攪勻成餡料。

醬油材料：
生油...................................3~4湯匙
老油...................................2~3湯匙(我無加)
糖.......................................4茶匙
滾水...................................半碗
芝麻油................................適量

做法：
(1) 將捲好的腸粉移到碟上。
(2) 加上醬油，即可。

北海道牛奶蛋糕

今日係母親節，二少話要去睇鴨仔，佢兩仔爺食完嘢就出咗去行街，承番我一個人係屋企，無嘢做，開工整定D蛋糕等佢兩個回家做茶點...

二少回來時，竟然同我講，比個驚喜我喎....哈哈哈!!! 原來佢買咗束迷你康乃馨回來送給我...真感動，抵我整定蛋糕等佢番嚟食... (^.^)

材料 (蛋糕紙底5cm，24個份量)： 

無鹽牛油(室溫).....………………450g

低筋麵粉…………………………450g
北海道3.6牛奶............................100g
雞蛋.............................................5隻
砂糖.............................................315g
泡打粉.........................................2.5茶匙

做法： 

(1) 牛油置於大碗中，分2次加入砂糖打至鬆發，焗爐預熱180度。 

(2) 蛋打勻，分2次加入(1)的牛油糊中拌勻。
(3) 牛奶分2次加入(2)的牛油蛋糊中拌勻。

(4) 粉類過篩，分2次加入(3)的蛋糊中拌勻。

(5) 倒入紙模至6成滿，入爐焗20分鐘，金黃色即成。

註：不同品牌的焗爐，溫度都有所差別，所以要自己加減時間。

亞麻籽蜂蜜奶油包

昨晚睡前打開個雪櫃，發現上次大少買嚟整芝心丸用剩咗的cream cheese，重有，唔知點解有咁多快餐店的牛油係到。今天一早起身就整個"亞麻籽蜂蜜奶油包"，比佢倆仔爺做下午茶先...

但佢個餡好"流"，好難包，可能我無放入雪櫃冰硬佢啦，攪到要快手包、又唔可以包太多餡。下次要唔落牛奶，可能會實D、好包D...

材料：
高筋麵粉.......................................240g

凍滾水...........................................175ml
糖...................................................1湯匙
有鹽牛油(溫室)..............................16g
乾酵母...........................................1茶匙
亞麻籽...........................................適量

餡料：
Cream Cheese.............................100g
牛奶................................................25g
糖....................................................20g
蜂蜜................................................1湯匙
蛋....................................................1隻
低筋麵粉........................................30g

餡料做法：
(1) 砂糖加入cream cheese中攪拌成膏狀。
(2) 蛋打散後分三次加入cream cheese糊中拌勻。
(3) 將篩過的低筋麵粉加入(2)中，並拌勻。
(4) 加入蜂蜜及牛奶拌勻。
(5) 放入雪櫃凝固便可。

麵包做法：
(1) 把水、牛油(切粒)、高筋麵粉、糖、酵母順序放入麵包機中。
(2) 麵包機選"攪麵團/Dough"功能，啟動。(3) 停機後，將麵團取出，置放於大盤中，輕按排氣。
(4) 手上手粉，分割成8等份的麵團，再蓋上濕毛巾放盤頂待20分鐘。
(5) 包餡、整形，置於已鋪牛油紙或錫紙的焗盤上。
(6) 把亞麻籽放在麵團上，把麵團連盤套上膠袋密封袋口，作第二次發酵。
(7) 發酵至二倍大，取出麵團，放入已預熱180度的焗爐，焗15分鐘便可。

註：
(1) 請緊記酵母是不可接觸到鹽及糖的，否則酵母會壞死。
(2) 不同品牌的焗爐，溫度都有所差別，所以要自己加減時間。

法式燉蛋

早兩日買咗個新焗爐，今日送貨，所以我今日放工回家特意整咗個法式燉蛋試機。原本想整法式焦糖燉蛋的，但因為我家没有火槍，所以今次整住法式燉蛋先啦...

我係美味DIY到找來這個食譜的，但我唔想太甜及想用哂D材料，所以改良咗少少，真係好好味!!! ^.^

材料： (6.5cm內口徑的約5 杯) 

忌廉………………………200g 

牛奶………………………200g 

糖 ………………………...30g 

蛋黃(大蛋).……………….3隻 (如果用細蛋，改用4隻)

做法： 

(1) 忌廉加蛋拌勻 

(2) 倒少許牛奶入 (1)，並將餘下牛奶煮滾，加糖煮至溶 

(3) 將忌廉蛋奶液拌勻，倒熱奶分次加入 

(4) 將以上蛋液倒回煲內加熱 

(5) 將以上材料倒入杯中，放入焗爐，隔水以 180 度火焗 25 分鐘即成 

註：可於冷涷後及食用前，於面加糖，再用火槍燒，製作焦糖面。不同品牌的焗爐，溫度都有所差別，所以要自己加減時間。

製法改編自香港電台的美味DIY
http://www.rthk.org.hk/elearning/dessert/cake_cremebrulee.htm
可看影片
http://www.rthk.org.hk/elearning/dessert/media/desserts/cremebrulee.asx

蕃茄燴芝心肉丸

今日大少新嘗試，整咗個芝心肉丸，好味!!! ^.^

芝心肉丸製法：(約11粒)

材料： 

半肥瘦豬肉...………………………....半斤

cream cheese………………………...30g

調味料：
油.....................................................1茶匙
鹽.....................................................3/5茶匙
糖.....................................................3/5茶匙
粟粉..................................................2茶匙
粟粉(撲粉用).....................................適量
蒜粒(切粒)........................................1粒
蛋白..................................................1隻

做法：
(1) 半肥瘦豬肉先清洗，再用刀切粒並剁至起膠有黏性。

(2) 將cream cheese分為11份。
(3) 將肉碎及所有調味料放入大碗中混和，最少醃30分鐘。

(4) 將已調味的肉碎分成約11份，放已掌心壓平，並於肉的中心放一粒cream cheese。

(5) 將肉碎稍微捲入內側，搓成球狀。

(6) 用油起鑊，肉丸撲上薄薄的粟粉，下鑊煎至熟透，盛起。

蕃茄燴芝心肉丸製法：

材料：
小蕃茄(切片).....................................2個
小蕃茄(切粒).....................................3個
洋蔥..................................................1個
薑(起鑊用).........................................適量
糖......................................................3茶匙
水......................................................2湯匙

汁料 (先拌勻)：
水.......................................................120g
鹽.......................................................1/2茶匙
糖.......................................................3茶匙
粟粉....................................................1茶匙

做法：
(1) 用油起鑊，爆香薑、洋蔥。
(2) 加入蕃茄粒、水2湯匙略炒一會。
(3) 加入肉丸，略炒一會，焗3分鐘。
(4) 加汁炒至收水。
(5) 最後加入蕃茄片略炒一會，便可上碟。

豆漿加蛋

那些年，係工業區返工的時候，由於公司樓下有好多流動小販賣嘢，當然咁早就緊係賣早餐多啦。我記得其中一檔係賣熱豆漿的，每天早上我都會買一杯來飲，重要加蛋添。講真呀，真係超好味架，再加一件腿蛋治...正!!!

不過，真係好好好好好保架....所以攪到我好好好好好肥...結果肥咗20磅，減咗一個月先至回復正常呀....之後我都唔係好夠膽再飲。

唔知點解，今日突然好想飲，返正二少都未飲過，佢又咁鍾意蛋，隨手攞咗D黃豆整番杯，同二少嘆吓下午茶先...

做法：

(1) 先將生雞蛋放入杯內。

(2) 再將剛煲好或已煮熱的豆漿倒入杯內。

(3) 蓋上杯蓋，焗五分鐘後便可飲用。